میں نے آئس ڈرگ کو نشے کے طور استعمال کرنا شروع کیا اور جب میری طلب بڑھتی گئی تو میں نے سوچا کہ اپنا نشہ پورا کرنے کے لیے کچھ کرنا چاہیے۔ یہی وجہ تھی کہ میں نے آئس ڈرگ کی فروخت شروع کر دی۔

مجھے آئس ڈرگ کا دھندا کرتے ہوئے تقریباً تین سال ہو چکے ہیں اور چونکہ میں اس کا ڈیلر ہوں لہٰذا ذاتی استعمال کے لیے میں آئس کی کچھ مقدار اپنے پاس رکھ سکتا ہوں۔

کرسٹل میتھ کی تیاری کے لیے باقاعدہ لیبارٹری کی ضرورت ہوتی ہے۔ یہ ایسا نشہ نہیں جسے آپ اپنے گھر پر بھی تیار کرسکیں۔ بعض لوگ اسے اپنے گھروں میں تیار کرنے کی کوشش کرتے ہیں لیکن اکثر وہاں دھماکے کی خبریں سننے کو ملتی ہیں۔

میں کراچی کی افغان بستی سے ’’آئس‘‘ خریدتا ہوں اور کرسٹل میتھ کی زیادہ تر سپلائی اسی علاقے سے یا پھر گڈاپ سے شہر کے دیگر حصوں تک پہنچتی ہے۔

آئس ڈرگ افغان بستی میں تیار نہیں کی جاتی بلکہ کہیں اور سے یہاں فروخت کے لیے لائی جاتی ہے۔ کچھ لوگوں نے افغان بستی میں اسے تیار کرنے کی کوشش کی لیکن ناکام رہے۔

میں مختلف اقسام کے لوگوں کو آئس نشہ فروخت کرتا ہوں جن میں طالبعلوں کے ساتھ ساتھ ملازمت پیشہ افراد بھی شامل ہیں۔

زیادہ تر لوگ اسے پہلی مرتبہ اس لیے استعمال کرتے ہیں کیونکہ یہ ایک سے دو روز تک جاگنے میں مدد فراہم کرتی ہے۔ آئس نشے کو رات بھر پارٹی کرنے یا پھر کئی گھنٹوں تک جاگ کر کام کرنے کے لیے استعمال کیا جاتا ہے۔ اور اسے استعمال کرنے والوں کو یہ احساس بھی نہیں ہوتا کہ وہ اس کے عادی ہوچکے ہیں۔